मुंबई(प्रतिनिधी):मुंबईहून अहमदाबाद येथे जाणाऱ्या शताब्दी एक्स्प्रेसमध्ये प्रवाशांना शीळे अन्न दिल्याची धक्कादायक घटना समोर आली आहे. मंगळवारी सकाळी मुंबईहून अहमदाबादला जाणाऱ्या शताब्दी एक्स्प्रेसमध्ये ही घटना घडली आहे. शीळ्या अन्नामुळे प्रवासांना मळमळ आणि उलट्या यांसारखे त्रास जाणवू लागल्याचे वृत्त आहे.

मुंबईहून अहमदाबादला जाणाऱ्या शताब्दी एक्स्प्रेसमध्ये सर्व प्रवाशांना चहा, नाश्ता रेल्वेकडून दिला जातो. मंगळवारी सकाळी नेहमीप्रमाणे प्रवाशांना नाश्ता देण्यात आला. या नाश्तामध्ये ब्रेड-बटर दिले गेले. मात्र, हे ब्रेड-बटर मुदत संपलेले (एक्सपायरी डेट) असून, तसेच ते दिल्याचे प्रवाशांच्या लक्षात आले. शीळे अन्न खाल्यामुळे प्रवाशांना त्रास होऊ लागला. काही प्रवाशांना उलट्याही झाल्या. याप्रकरणी तातडीने तक्रार करण्यात आली. रेल्वेच्या अधिकाऱ्यांनी या घटनेला दुजोरा दिलाआहे.   

                                                                                                                                                                                                         शताब्दी एक्स्प्रेस   या गाडीत प्रवाशांना शीळे अन्न दिल्याची वृत्त समजले आहे. या प्रकरणी चौकशी करून दोषींविरोधात कडक कारवाई करण्यात येईल, अशी ग्वाही रेल्वेच्या अधिकाऱ्यांनी दिली. घटनेचे गांभीर्य लक्षात घेऊन 'आयआरसीटीसी'च्या अधिकाऱ्यांना निलंबित करण्यात आले आहे. त्याचप्रमाणे खानपान कंत्राटदाराला कंत्राट रद्द करण्याविषयी नोटीस बजावण्यात आली आहे, अशी माहितीही अधिकाऱ्यांकडून देण्यात आली.   प्रवाशांची तब्येत बिघडल्याची माहिती मिळताच सुरत स्थानकावर डॉक्टरांचे पथक पाठवण्यात आले आणि प्रवाशांवर तातडीने उपचार करण्यात आले. एका ट्विटर युजरने एक फोटो शेअर केला आहे. यामध्ये शीळ्या ब्रेडवर बुरशी जमा झाल्याचे स्पष्टपण दिसत आहे. शताब्दीमध्ये सेवा देणाऱ्या कर्मचाऱ्यांनी मुद्दामहून शीळ्या अन्नाकडे दुर्लक्ष केले आणि तसेच अन्न प्रवाशांना दिले, असा आरोपही या प्रवाशाने केला. दरम्यान, शताब्दी एक्स्प्रेसमधील अन्नाबाबत अनेकदा तक्रारी करण्यात आल्या आहेत.