नाशिक: कृपोषण निर्मुलनासाठी वरदान मानन्यात येणा-या शेवग्याच्या झाडांची माहिती देवून जिल्हयातील सर्व ग्रामपंचायती, अंगणवाडी व प्राथमिक शाळांमध्ये मागील वर्षी शेवगा लागवडीसाठी जिल्हा परिषदेचे मुख्य कार्यकारी अधिकारी डॉ. नरेश गिते यांनी चळवळ सुरु केली होती. यापासूनच प्रेरणा घेत नाशिक तालुक्यातील लाडची येथील प्राथमिक शाळेमध्ये विद्यार्थी व शिक्षकांनी शेवगा रोपवाटिका तयार केली आहे. या रोपवाटिकेतून तयार करण्यात येत असलेली रोपे मागणीनुसार शेतकरी तसेच अंगणवाडींना उपलब्ध करुन देण्यात येत असून लाडची शाळेच्या या अभिनव उपक्रमाचे सर्वत्र कौतूक होत आहे.
जिल्हयातील कुपोषणाच्या निर्मुलनासाठी मागील वर्षी जिल्हा परिषदेचे मुख्य कार्यकारी अधिकारी यांनी ग्राम विकास केंद्र सुरु केली होती. तसेच तालुका आढावा बैठकांमध्ये शेवगा लागवडीविषयी
माहिती
देवून ग्रामपंचायत, शाळा, अंगणवाडी, प्राथमिक आरोग्य केंद्र येथे शेवगा लागवड करण्यासाठी आवाहन केले होते. या उपक्रमाची दखल घेत अनेक शेतक-यांनी जिल्हा परिषदेला शेवगा बियाणे उपलबध करुन दिले होते. नाशिक तालुक्यातील लाडची शाळेतील विज्ञान शिक्षक विवेक खैरनार यांनी विद्यार्थ्याबरोबर चर्चा करुन शेवगा रोपवाटिका तयार करण्यासाठी प्रयत्न सुरु केले. मुख्याध्यापक विजयकुमार मोरे यांनीही या उपक्रमाचे कौतूक करुन त्यामध्ये सहभाग घेतला.
त्यानुसार पंचवटी येथील पांजरपोळ येथून तसेच घरांमधील फेकण्यात येणा-या दुधाच्या रिकाम्या पिशव्या संकलित करण्यात आल्या. फेब्रुवारी महिन्यात सहावीच्या विद्यार्थ्यांनी रोपवाटिकेसाठी आच्छादन व शाळेतील भंगार साहित्य वापरुन कुंपन तयार केले. यानंतर शाळेतील शिक्षक कोंडाजी मोरे यांनी शेवगा बियाणे उपलब्ध करुन दिले. त्याला अंकूर येण्यासाठी प्रक्रिया करण्यात आली. शालेय वेळेनंतर रोपवाटिकेची निगा राखणे, पाणी देणे, रोपवाटिकेचे सरंक्षण करणे ही काम करण्यात आली. सुरुवातीला केवळ शेवग्यासाठी सुरु करण्यात आलेल्या या रोपवाटिकेत सध्या शेवग्याची ७०, विलायत चिंच, करंज, चिंच आदि झाडांची ३५० रोपे वाढत आहेत. शाळेच्या या उपक्रमाची दखल घेत गावकरी तसेच अंगणवाडी सेविका धनश्री पारधी, मदतनीस हौसाबाई फसाळे या देखील शालेय वेळेनंतर रोपांचे सरंक्षण करण्यासाठी योगदाण देत आहेत. नाशिक येथील महेंद्र पटेल, अंगणवाडी सेविका तसेच शेतकरी यांनी शाळेकडे रोपांची मागणी नोंदविली आहे. ग्रामपंचायतीने देखील यामध्ये सहभागी होवून रोपवाटिकेसाठी पाणी उपलबध करुन दिले आहे. लाडची येथील या अभिनव उपक्रमाचे सर्वत्र कौतुक होत होत आहे.
कुपोषण निर्मुलनासाठी शेगवा उपयुक्त- डॉ. नरेश गिते
शेवग्याला जादुई वृक्ष असेही म्हटले जाते. शेवग्याचे झाड आरोग्यासाठी अतिशय उपयुक्त असून कुपोषण निर्मुलनासाठी सदरचे झाड वरदान आहे. शेवग्याच्या झाडाचे फुल, शेंगा, पाला यापासून आवश्यक पोषकतत्व प्राप्त होत असल्याने दैनंदिन आहारात याचा वापर कारणे गरजेचे आहे. यावर्षीही पावसाळयात सर्व ग्रामपंचायत, शाळा, अंगणवाडी, प्राथमिक आरोग्य केंद्र या ठिकाणी शेवगा लागवड करण्याच्या सुचना देण्यात आल्या आहेत. नाशिक तालुक्यातील लाडची शाळेने यासाठी घेतलेला पुढाकार कौतुकास्पद व प्रेरणादायी आहे.