अहमदनगरसरकारच्या विश्वासघाताविरोधात २० फेब्रुवारीपासून नाशिकहून काढण्यात येत असलेला लॉंग मार्च रोखण्यासाठी सरकारने दडपशाही सुरू केली असल्याचा आरोप अखिल भारतीय किसान सभेने केला आहे. अहमदनगर येथे लॉंग मार्च काढण्याची तयारी करण्यासाठी १३ फेब्रुवारीला शेतकऱ्यांची परिषद घेऊन निवेदन दिले म्हणून किसान सभेचे राज्य सरचिटणीस डॉ. अजित नवले यांच्यावर गुन्हा नोंदविण्यात आला असून त्यांना अटक करण्याच्या हालचाली सुरू करण्यात आली असल्याचा आरोप किसान सभेने केला आहे. लॉंग मार्चची तयारी करण्यासाठी परिषद घेतल्याने कोठेही शांततेचा भंग झालेला नव्हता. परिषद घेत असल्याची पूर्वकल्पना किसान सभेने पोलिसांना अगोदरच दिली होती. परिषदेनंतर जिल्हाधिकारी यांना निवेदन देण्यात येईल असेही पोलिसांना अगोदरच कळविले होते. कार्यक्रम शांततेत करा, आमची त्याला काहीच हरकत नाही असे पोलिसांनी सांगितले होते. ठरल्याप्रमाणे परिषद अत्यंत शांततेत पार पडली. निवेदन देण्याचा कार्यक्रमही अत्यंत शांततेत संपन्न झाला. असे असताना नंतर कोणाच्या इशाऱ्यामुळे या केसेस दाखल झाल्या हे राज्यभरातील शेतकऱ्यांना नक्कीच चांगले माहीत असल्याचे किसान सभेचे सरचिटणीस डॉ. अजित नवले यांनी सांगितले. भीषण दुष्काळ व सिंचनाचे प्रश्न, जमिनीचे हक्क, संपूर्ण कर्जमुक्ती, शेतीमालाला दीडपट हमीभाव, शेतकरीहिताची पीक विमा योजना, शेतकरी-शेतमजुरांना व निराधारांना वाढीव पेन्शन, रेशन व अन्न अधिकार यासह सर्व शेतकरी मागण्या धसास लावल्याशिवाय राज्यभरातील शेतकरी आता स्वस्थ बसणार नसल्याचे किसान सभेचे नेते आमदार जे. पी. गावित यांनी सांगितले. २० फेब्रुवारीपासून हा लाँग मार्च सुरू होणार असून सात दिवस पायी चालत हा मोर्चा २७ फेब्रुवारी रोजी मुंबईत धडकणार आहे. मागील लाँग मार्चच्या वेळी दिलेले आश्वासन सरकारने पूर्ण न केल्यामुळे पुन्हा लाँग मार्च काढावा लागत असल्याचे गावित यांनी सांगितले.