मुंबई: चारकोप येथील सम्यक समता प्रतिष्ठान संस्थेच्या वतीने "शैक्षणिक,सामाजिक,पोलीस दल,वैद्यकीय" क्षेत्रातील कर्मयोगी महिलांना देण्यात येणारा "क्रांतीज्योती २०२४" पुरस्कार सोहळा मोठ्या उत्साहात संपन्न झाला. यंदाचा पुरस्कार पोलीस दलातील आपल्या धाडसी आणि जिगरबाज कामगिरीसाठी ओळखल्या जाणाऱ्या महिला अधिकारी वरिष्ठ पोलीस निरीक्षक ज्योती भोपळे, वैद्यकीय क्षेत्रात सामाजिक वसा जपत उल्लेखनीय कार्ये करण्याऱ्या डॉ. अवनी कांबळे, शैक्षणिक व सामाजिक क्षेत्रात उल्लेखनीय योगदान देणाऱ्या शिक्षिका स्पृहा सुरेश इंदू,सामाजिक कार्यकर्त्या निर्मलाताई घोरपडे, चर्मोद्योग कामगार सेनेच्या माध्यमातून सामाजिक कार्ये करणाऱ्या सीमा लोकरे आदी मान्यवरांना संस्थेचे अध्यक्ष ॲड.राहुल वारे यांच्या हस्ते प्रदान करण्यात आला.

     कार्यक्रमाच्या प्रमुख अतिथी, राज्य महिला आयोगाचे सदस्य उत्कर्षाताई रुपवते आपल्या व्यस्त कार्यक्रमामुळे पुरस्कार सोहळ्यास उपस्थित राहू शकल्या नाहीत. मात्र त्यांनी दृकश्राव्य संदेशाद्वारे पुरस्कार विजेत्या क्रांतिज्योतींचे अभिनंदन केले. तसेच सावित्रीमाईंच्या कार्य-कर्तुत्वाला उजाळा दिला. सावित्रीमाईंनी महिला सबलीकरणाची चळवळ उभी केली. ही चळवळ सवित्रिमाईंच्या लेकीं पुढे नेत आहे याचा आम्हाला अभिमान आहे असे म्हणत पुरस्कारार्थी मान्यवरांचा गौरव केला. पुरस्कार विजेत्या क्रांतिज्योतींनी सावित्रीमाई होत्या म्हणूनच आमचे आजचे अस्तित्व आहे अशा भावना व्यक्त करत सावित्रीमाईंच्या कार्याला उजाळा दिला. कार्यक्रमाचे अध्यक्षस्थान दैनिक आदर्श महाराष्ट्रचे कार्यकारी संपादक ॲड.राहुल वारे यांनी भूषविले. तर कार्यक्रमाचे सूत्रसंचालन संस्थेचे सचिव सी. ओ. ढीवरे यांनी केले. तर मान्यवरांचे आभार सम्यक ज्येष्ठ नागरिक संघाचे अध्यक्ष अशोक कांबळे यांनी मानले. कार्यक्रमाची सुरुवात जेतवन सांस्कृतिक केंद्र, महिला मंडळाने सुरेल गीतांनी केली.
     हा पुरस्कार सोहळा रविवार, दिनांक ७ जानेवारी २०२४ रोजी जेतवन सांस्कृतिक केंद्र,बुद्ध विहार, चारकोप, कांदिवली येथे संपन्न झाला. कार्यक्रमाला चारकोप आणि गोराईवासियांचा भरघोस प्रतिसाद लाभला. कार्यक्रम यशस्वी करण्यासाठी अरुण साळवी, अशोक कांबळे, रघुनाथ शिरसाट, राजेश जाधव, मनोहर मोकळ, राजाराम अहिरे, भगवान घोसाळे, जी.बी.वाघमारे,दीपक निळवे, हरीश आनंद, मिलिंद खरात, मधुकर ननावरे, भाऊसाहेब केदार, सुरेंद्र मनोहर, एस.एस.पगारे, सुगंध आळेकर, साहेबराव साळुंखे, दीपक निळवे, दामू गंगावणे, कमलताई पवार, लक्ष्मीताई कापडे आदी मान्यवरांनी विशेष परिश्रम घेतले. तसेच जेतवन सांस्कृतिक केंद्र महिला मंडळ, भारतीय बौद्ध महासभा चारकोप आणि गोराई विभाग, सम्यक ज्येष्ठ नागरिक संघ, नवयान धम्मचक्र बुद्ध विहार आदी संस्थांचे विशेष सहकार्य लाभले.