मुलुंड:(शेखर भोसले)मुलुंड पश्चिम येथील आर मॉल स्थित व्हि.जे.एन.ज्वेलर्स या ज्वेलरी दुकानावर शिवसेना मुलुंड विभागाचे उपविभाग प्रमुख सुनिल गारे यांच्या नेतृत्वाखाली गुरुवार दि २९ ऑक्टोबर रोजी काही शिवसैनिकांनी धडक देवून तेथील व्यवस्थापकांकडे येथे चालत असलेल्या भीशीतील ग्राहकांना न्याय द्यावा व ग्राहकांच्या हक्काचे पैसे त्यांच्या मागणी नुसार परत करावेत अशी मागणी केली. भीशीतील ग्राहकांना न्याय न दिल्यास शिवसेना स्टाईलने आंदोलन करण्यात येईल असा ईशारा देखील यावेळी मुलुंड शिवसेना विभागातर्फे व्यवस्थापनाला देण्यात आला. येथील भीशी योजनेतील ग्राहकांना पैसे मिळत नसल्याच्या अनेक तक्रारी शिवसेना मुलुंड विभागाकडे आल्या होत्या त्या अनुषंगाने आज येथील दुकानात शिवसैनिकांनी धडक देवून तेथील व्यवस्थापकांना ईशारा दिला.

मुलुंड पश्चिम येथील आर मॉल स्थित व्हि. जे. एन. ज्वेलर्स येथे गेल्या अनेक वर्षांपासून भीशी योजना सूरू आहे. परंतु कोरोणा काळातील लॉकडाऊनमुळे ही योजना विस्कळीत झाली असल्याने अनेक ग्राहकांना येथे गुंतवलेले त्यांच्या हक्काचे पैसे मिळत नसल्याच्या तक्रारी समोर आल्या आहेत. काही ग्राहकांना त्यांनी पैसे गुंतवलेल्या योजनेची मुदत पूर्ण झाली असूनही तसेच नियमानुसार त्यांना व्याजासहीत पूर्ण पैसे मिळणे अपेक्षित असतानाही अश्या ग्राहकांना पैसे न देता परत पाठवले जात होते. तर काही ग्राहकांना या योजनेत गुंतवलेल्या पैश्यांवर व्याज देखील दिले जात नव्हते. अश्या ग्राहकांचे पैसे बिनव्याजी या ज्वेलर्स कडून वापरले जात आहेत. तसेच ज्यांची मुदत संपलेली नाही परंतु लॉक डाऊनमुळे पैशाची चणचण भासत आहे अश्या ग्राहकांना त्यांनी मागणी करूनही पैसे दिले जात नाही आहेत. अश्या प्रकारच्या अनेक तक्रारी व्हि.जे.एन.ज्वेलर्स मधील भीशी योजनेत पैसे गुंतवलेल्या ग्राहकांकडून शिवसेना मुलुंड विभागाकडे आल्या होत्या. या सर्व ग्राहकांना न्याय मिळावा यासाठी आज उपविभाग प्रमुख सुनिल गारे यांच्या नेतृत्वाखाली मुलुंड विधानसभा कार्यालय प्रमुख सीताराम खांडेकर, अभिजित चव्हाण, यशवंत यादव, शेखर भोसले, प्रविण सावंत, तुषार शिंदे व इतर शिवसैनिकांनी या दुकानावर धडक देवून जाब विचारला व ग्राहकांना त्यांच्या हक्काचे पैसे त्यांच्या मागणी नुसार देण्यात यावे अन्यथा शिवसेना स्टाईलने धडा शिकवला जाईल असा सज्जड दम येथील व्यवस्थापनाला देण्यात आला आहे. 

ग्राहकांचे पैसे डुबवले जाणार नसून जसे जसे ग्राहकांची मागणी येईल त्याप्रमाणे पैसे दिले जातील. लॉक डाऊन मुळे परिस्थिती बिकट होती परंतु ग्राहकांच्या मागणी नुसार पैसे दिले जातील असे व्हि.जे.एन.ज्वेलर्सच्या व्यवस्थापकांनी यासंदर्भात शिवसेनेच्या प्रतिनिधींना आश्वासन दिले आहे.