नवी दिल्ली,दि२४ : भारत झपाट्याने कोरोनामुक्त देश होत आहे. देशाचा कोरोना रिकव्हरी रेट ८९.७ टक्के तर डेथ रेट (मृत्यू दर) १.५१ टक्के आहे. भारतात ताज्या आकडेवारीनुसार ६ लाख ८० हजार ६४४ कोरोना अॅक्टिव्ह रुग्ण आहेत. देशात आतापर्यंत ७८ लाख १४ हजार ६८२ जणांना कोरोनाची लागण झाली. यापैकी ७० लाख १६ हजार ४६ जण कोरोनामुक्त झाले. कोरोनामुळे देशात १ लाख १७ हजार ९९२ जणांचा मृत्यू झाला.

भारतात सणासमुदीच्या दिवसांमुळे पुढील दिड महिन्यात नागरिक बाहेर पडण्याची आणि भेटीगाठीच्या निमित्ताने एकत्र येण्याची शक्यता जास्त आहे. भारतासाठी हा कालावधी महत्त्वाचा आहे. या कालावधीत कोरोना संकट वाढले नाही तर देशातली महामारीची समस्या लवकरच आटोक्यात येईल. सध्या भारतामध्ये कोरोनाच्या वेगवेगळ्या लसींसाठी प्रयोग सुरू आहेत. कोरोनावर मात करण्यासाठी भारतीय लस २०२१च्या पहिल्या तिमाहीत तयार होईल, असा विश्वास केंद्रीय आरोग्यमंत्री डॉ. हर्षवर्धन यांनी व्यक्त केला.

भारत बायोटेक आणि सीरमसह देशातील सात कंपन्या कोरोनावर मात करण्यासाठी लस करण्याकरिता संशोधन करत आहेत. प्रत्येक संस्थेचे संशोधन वेगवेगळ्या टप्प्यावर असले तरी प्रगतीपथावर आहे. भारतात कोरोना रिकव्हरी रेट वाढत असताना लस आल्यास संकटावर मात करणे आणखी सोपे होईल, अशी आशा आहे. ताज्या अहवाला नुसार सीरम आणि भारत बायोटेक या दोन कंपन्यांचे प्रयोग यशस्वी झाल्यास या दोन्ही कंपन्या २०२१च्या पहिल्या तिमाहीत लस बाजारात आणण्याची शक्यता आहे.

कोरोनाचा विळखा जनगभरात वाढत आहे. भारतातही कोरोनाचे रुग्ण अजूनही ५० हजारहून अधिक दर दिवसाला वाढत आहेत. त्यामुळे कोरोनाची लस लवकरात लवकर उपलब्ध व्हावी यासाठी सर्वजण प्रतीक्षा करत आहेत. ऑक्सफोर्ड आणि सीरम इन्स्टिट्यूटनं तयार केलेल्या लशीची चाचणी देखील सध्या तिसऱ्या टप्प्यात सुरू आहे.हैदराबादस्थित असलेल्या या कंपनीने २ ऑक्टोबर रोजी DCGI कडे तिसऱ्या टप्प्यातील चाचणीसाठी अर्ज केला होता. त्यानंतर या कंपनीला परवानगी देण्यात आली आहे. १२ ते १४ राज्यातील २०हजारहून अधिक नागरिकांवर या लशीची चाचणी होणार आहे. मार्च अखेरपर्यंत या लशीचे सर्व परिणामांची माहिती मिळू शकते त्यामुळे जूनपर्यंत ही लस उपलब्ध करून देता येऊ शकते असं भारत बायोटेक इंटरनॅशनल लिमिटेडचे ​​कार्यकारी संचालक साई प्रसाद यांनी दावा केला आहे.