मुंबई दि,१४:कोरोनाचे केंद्र बिंदू ठरत असलेल्या मालाड परिसरात दिवसेंदिवस कोरोना पाॅझिटीव्ह रुग्णांची संख्या वाढतच आहे. रुग्णांची वाढत्या संख्येवर नियंत्रण मिळवण्यासाठी मालाड, मढ परिसरात आज (सोमवारी)  लाॅकडाऊन कडक करण्याचा निर्णय विभागस्तरावर घेण्यात आला आहे. दरम्यान,  मालाड परिसरातील प्रत्येक नागरिकाची तपासणी करण्यात येणार असून स्क्रिनिंगसाठी २० टीम तैनात करण्यात आल्या पी उत्तर विभागाच्या आरोग्य विभागातील अधिकाऱ्याने सांगितले.

मुंबईत कोरोना रुग्ण वाढीचा दर २६ दिवसांवर पोहोचला असताना पी उत्तर विभागात कोरोना बाधित रुग्णांची संख्या २,७६९ वर पोहोचली आहे. त्यामुळे आरोग्य विभागासमोर चॅलेंज उभे ठाकले आहे मालाड परिसरात कोरोना रुग्ण वाढीचा कालावधी ११ दिवसांवर आला आहे. परंतु वाढत जाणाऱ्या रुग्ण संख्येमुळे आरोग्य विभागाची झोप उडाली आहे. मालाड, मालवणी व मढ परिसरात कोरोना रुगांचा 

आकडा वाढत असला तरी आजही सोशल डिस्टन्सिंगचे धाब्यावर बसवले जात आहे. 

त्यामुळेच महानगरपालिकेच्या पी- उत्तर विभागामध्ये कंटेन्टमेंट झोन परिसरातील रहिवाशांचे ‘स्क्रिनिंग’ करण्यासाठी डॉक्टर्स व वैद्यकीय कर्मचाऱ्यांच्या २० टीम तयार करण्यात आल्या आहेत. या टीम प्रत्येक इमारतीत व झोपडपट्टीतील प्रत्येक घरात जाऊन वैद्यकीय तपासणी करणार असल्याची माहिती मुंबई शहरचे पालकमंत्री अस्लम शेख यांनी दिली.

सार्वजनिक शौचालयांचे दिवसातून ६ ते ७ वेळा निर्जंतुकीकरण करण्याचे आदेश देण्यात आलेले आहेत. कंटेन्टमेंट झोनमध्ये वैद्यकीय शिबीरे घेऊन लोकांच्या वैद्यकीय तपासण्या करण्यात येत आहेत. जीवनसत्त्व – सी गोळ्यांचे वाटपही करण्यात येत आहे. पावसाळा सुरु झाल्यानंतर अशा स्वरुपाच्या केसेमध्ये वाढ होणार हे गृहित धरुन आधीपासूनच विलगीकरण केंद्र व अन्य सर्व प्रकारच्या व्यवस्था करण्यात आल्याचे शेख यांनी सांगितले.