15 शिकाऊ डॉक्टर, 15 परिचारिका कोरोनाबाधित ; हॉस्पिटल प्रशासन सुस्त   पनवेल: कोविड रुग्णांवर उपचार करणारे 15 शिकाऊ डॉक्टर आणि जवळपास तितक्याच परिचारिकांना कोरोनाने घेरले असतानाही कामोठे एमजीएम हॉस्पिटल प्रशासन हेळसांडपणा करत कोविड रुग्ण आणि डॉक्टर, परिचारिकांच्या जीवाशी खेळत असल्याने त्यांच्या ताब्यातून हॉस्पिटलचे नियंत्रण काढून महापालिका प्रशासनाने हाती घ्यावे, अशी महत्वपूर्ण मागणी पनवेल संघर्ष समितीने सोमवारी, 1 जूनला आयुक्तांकडे केली आहे.

हॉस्पिटलमध्ये 170 शिकाऊ डॉक्टर आहेत. त्याशिवाय शंभरऐक डॉक्टर प्रत्यक्षात कार्यरत असताना कोविड रुग्णांची जबाबदारी मेडिकल कॉलेजचे विद्यार्थी असलेल्या शिकाऊ डॉक्टरांच्या माथी मारली आहे. त्यातील 15 डॉक्टर आणि 15 परिचारिका कोरोनाबाधित झाल्या आहेत. त्यांच्यावर तिसऱ्या मजल्यावर उपचार सुरू आहेत. अतिशय गंभीर बाब म्हणजे इतर शिकाऊ डॉक्टरांना जबरदस्तीने कोरोना रुग्णांवर उपचार करण्याची सक्ती प्रशासनाने त्यांच्यावर केली आहे. प्रत्यक्षात तिथे डॉक्टर असलेले कोविड रुग्णालयात फिरकतही नाहीत, अशी शिकाऊ डॉक्टरांची गंभीर तक्रार असल्याचे पनवेल संघर्ष समितीचे अध्यक्ष कांतीलाल कडू यांनी पत्रांतून महापालिका आयुक्त सुधाकर देशमुख आणि रायगड जिल्हाधिकारी निधी चौधरी यांच्या निदर्शनास आणून दिले आहे.

याशिवाय शिकाऊ डॉक्टर आणि कोरोनाबाधित रुग्णांच्या भोजनाची व्यवस्थाही ढेपाळलेली आहे. त्यातील काही शिकाऊ डॉक्टर कोरोनाचे संशयित रुग्ण असतानाही त्यांना होस्टेलमध्ये एकत्रच ठेवून कोरोना संसर्गाला निमंत्रणच दिले आहे. याबाबत हॉस्पिटलचे विश्वस्त डॉ. सुधीर कदम, कमांडर सोलग्रात्रा हे कारणीभूत असून त्यांच्याविरुद्ध हलगर्जीपणाची कायदेशीर कारवाई करण्याची मागणीही कडू यांनी केली आहे.

पनवेल उपजिल्हा रुग्णालयात शंभर खाटांच्या कोविड हॉस्पिटलला जिल्हा प्रशासनाने परवानगी दिल्यानंतर तिथे अपुरी व्यवस्था होईल, अशी अटकळ बांधून पनवेल संघर्ष समितीने कोविडसाठी एमजीएम कामोठेला परवानगी देण्यास जिल्हा प्रशासनाला प्रवृत्त केले. मात्र, नियंत्रण एमजीएमकडे प्रशासनाने ठेवल्याने रुग्णांची हेळसांड होत आहे. त्याकडे आता संघर्ष समितीनेच प्रशासनाचे पुन्हा लक्ष वेधून हॉस्पिटलच्या ढिसाळ यंत्रणेचा पर्दापाश केला आहे. याबाबत महापालिका आणि जिल्हा प्रशासनाने तातडीने उचित पावले उचलावित, अशी मागणी कडू यांनी केली आहे.

महापालिका आणि हॉस्पिटल प्रशासनात झालेल्या कराराप्रमाणे कोरोना रुग्णांसाठी लागणारे साहित्य, खाटा, डॉक्टर, औषध, डॉक्टर हॉस्पिटल पुरवणार असून ठरल्याप्रमाणे त्यांचे महिन्याला बिल महापालिका देणार आहे. त्यामुळे प्रत्यक्ष ताबा पालिकेकडे नसल्याने एमजीएम प्रशासनाची मुजोरी सुरूच आहे. इतर रुग्णांनाही त्याचा त्रास होत आहे. शिवाय तेथील यंत्रणा कोलमडली असल्याने त्यावर अंकुश ठेवणे अत्यंत महत्वाचे आहे, असे कांतीलाल कडू यांनी आयुक्तांना कळविले आहे.