कोरोनाच्या उपचारासाठी एस आणि टी वार्डातील रुग्णांची रुग्णालयाबाहेर वेटिंगलाईन
- by Adarsh Maharashtra
- May 26, 2020
- 1760 views
मुलुंड : (शेखर चंद्रकांत भोसले)भांडूपच्या एस आणि मुलुंडच्या टी वार्ड परिसरातील कोरोनाबाधित रुग्णांसाठी येथील पालिकेच्या रुग्णालयात आणि शासकीय रुग्णालयात तसेच नव्याने बनविण्यात आलेल्या कोविड उपचार केंद्रात बेड उपलब्ध नसल्यामुळे रुग्णांचे अतोनात हाल होत असून काही रुग्णांना बेडसाठी दोन दिवसांची प्रतिक्षा करावी लागत आहे तर काहींना घरातच उपचार करावे लागत आहे.
राज्य सरकार आणि पालिका प्रशासनाकडून कोरोना रुग्णांना पुरेपूर सोयी सुविधा दिल्या जातात असा दावा केला जात असला तरी मुलुंड, भांडूप, पवई परिसरातील सर्वच रुग्णालये कोरोनाबाधित रुग्णांनी भरलेली असल्यामुळे नव्याने कोरोना झालेल्या रुग्णांसाठी बेड उपलब्ध होत नाही आहेत त्यामुळे कोविड उपचार केंद्राच्या बाहेर भरती होण्यासाठी रुग्णांना ताटकळत रहावे लागत आहे किंवा घरातच उपचार करावे लागत आहे. काही रुग्णांना रुग्णालयात दाखल होण्यासाठी दोन दिवसांपर्यंत प्रतिक्षा देखील करावी लागत आहे. रुग्णालयातील सर्वच बेड भरले असल्यामुळे लक्षणे नसलेले कोविड रुग्ण आणि सौम्य लक्षणे असलेल्या कोविड रुग्णांना घरातच उपचार करायला सांगितले जात आहे. मुलुंड पुर्व मधील टाटा कॉलनीतील एका रुग्णाला हा अनुभव आला असून त्याला घरातच उपचार करायला पालिकेने सांगितले आहे. तर भांडूप येथील एका कोरोना रुग्णाला ऑक्सिजनची सुविधा असलेला बेड उपलब्ध न झाल्यामुळे मृत्यूला सामोरे जावे लागले आहे.
मुलुंडमधील दुसऱ्या एका रुग्णास डॉक्टरांनी रुग्णालयात हलविण्यात यावे असे सांगण्यात आले होते त्यानुसार रुग्णांच्या नातेवाईकांनी पालिका प्रशासनाशी वारंवार संपर्क केला तरी देखील रुग्णालयातील बेड उपलब्ध नसल्यामुळे दोन दिवसांपर्यंत या रुग्णास कोरोनाच्या उपचारासाठी रुग्णालयात दाखल करण्यासाठी पालिकेकडून कुठलीच हालचाल झाली नाही. अखेर दोन दिवसांनी बेड उपलब्ध झाल्यावर या रुग्णास रुग्णालयात भरती करण्यात आले परंतु तो पर्यंत कुटुंबातील इतरांना तसेच इमारतीतील इतर सदस्यांना संसर्ग होवू नये म्हणून खूपच काळजी घ्यावी लागत होती तसेच सतत सॅनिटायझर फवारणी करावी लागली.
पालिकेच्या आरोग्य अधिकाऱ्यांनी यासंदर्भात सांगितले की पालिका रुग्णालयातील तसेच शासकीय रुग्णालयातील सर्वच बेड कोरोना रुग्णांनी भरले असल्यामुळे काही सौम्य लक्षणे असलेल्या रुग्णांना घरातच राहून उपचार करण्यास सांगण्यास आले आहे. अश्या रुग्णांना पालिकेचे आरोग्य कर्मचारी वेळोवेळी मार्गदर्शन करुन औषधोपचार करत आहेत. पालिकेतर्फे नवीन कोविड उपचार केंद्र बनविण्यात येत असून ही उपचार केंद्रे बनवून झाली की अनेक रुग्णांची सोय येथे होवू शकते.
रिपोर्टर
Adarsh Maharashtra is a Digital Media Site. This app is the mobile Version of Adarsh Maharashtra Marathi News Paper. It is 24 hour web news and local news which assure you to show only what is truth, the idea behind Adarsh Maharashtra News to make aware what is happening all over, and to combine advanced news delivery technologies. We are hard working, honest and courages who wants do something for our people and coming generation.
आदर्श महाराष्ट्र वेब टीम