मुंबई दि.२४ : सत्तेसाठी जीवाभावाच्या मित्र पक्षाची साथ सोडून काँग्रेसचा हात धरणाऱ्या शिवसेनेची पालिका निवडणुकीत कोंडी करण्यासाठी सरसावलेल्या भाजपाने थेट मातोश्रीच्या प्रांगणात भाजपा सेवाभवन कार्यालय थाटून सेनेच्या बालेकिल्यांना सुरंग लावण्याची छुपी मोहिम सुरू केली आहे. 

त्यासाठी येथील शिवसेना नगरसेवक आणि सेनेचा प्रभाव असलेल्या वांद्रे पूर्व सिद्धार्थ नगर भागात भाजपाने स्वतःचे सेवाभवन जनसंपर्क कार्यालय थाटले. त्याचे शनिवारी भाजपा खासदार पूनम महाजन यांच्या हस्ते उदघाटन करण्यात आले. भाजपा मुंबई प्रदेश सचिव, माजी नगरसेवक महेश पारकर आणि येथील लोकप्रिय युवा कार्यकर्ते प्रवीण घाडगे, नगरसेवक सुषमा सावंत,जिल्हा सरचिटणीस नितेश सिंह  यांच्या खांद्यावर या मोहिमेची धुरा आहे. निवडणुकीला अवधी असताना अचानक थाटलेल्या या सेवाभवन कार्यालयाने शिवसेनेच्या गोटात प्रचंड अस्वस्थता आणि आश्चर्य व्यक्त केले जात आहे.    

मागील विधानसभा निवडणुकीत याच प्रभागातील शिवसेनेचे दिवंगत लोकप्रिय आमदार बाळा सावंत यांच्या पत्नी तृप्ती सावंत यांचे तिकीट कापून महापौर विश्वनाथ महाडेश्वर यांना उमेदवारी दिली. त्यामुळे नाराज शिवसैनिकांनी अपक्ष उभे राहिलेल्या सावंत यांना मतदान केले. शिवसेनेचा स्वतःच्या घरातच पराभव होऊन महापौर पडले. त्यात बाहेरून आलेल्या, कोणतेही कर्तृत्व नसलेल्या काँग्रेसला विजय मिळाला. 

शिवाय यापूर्वी देखील शिवसेनेचे अशाच प्रकारे निष्ठावंत कार्यकर्त्यांना डावलून बाहेरील लोकांना तिकीट दिल्याने शिवसैनिकां मध्ये नाराजी आहे. या घटनांमुळे निर्माण झालेली पोकळी भरून काढण्यासाठी भाजपाने थेट मातोश्रीच्या प्रागंणात शिरकाव करून शिवसेनेची कोंडी करण्याचा डाव आखला आहे. त्याचाच भाग म्हणून भाजपाचा एकही कॅडर कार्यकर्ता नसलेल्या मात्र, सेनेचे सर्वाधिक कार्यकर्ते असलेल्या सिद्धार्थ नगर परिसरात भाजपा कार्यालय सुरू  करू स्थानिक नेत्यांना धक्का दिला आहे. त्यामुळे आगामी मुंबई महानगरपालिका निवडणुकीत वांद्रयातील अनेक प्रभागांत शिवसेना आणि भाजपामध्ये चुरशीची लढत निश्चित आहे. 

दरम्यान, सेवाभवन जनसंपर्क कार्यालयातून स्थानिक प्रश्न, रोजगार आणि केंद्रातील विविध योजनांचा फायदा करून दिला जाईल, अशी माहिती सेवाभवन कार्यालयाचे प्रमुख प्रवीण घाडगे यांनी दिली. तर भाजपाचे हे सेवाभवन निवडणुकीपूर्वीच सेनेची कोंडी करण्यासाठी चालवलेले कारस्थान असल्याचे सेनेच्या गोटात बोलले जात आहे.