कोलकाता - भारत आणि विंडीज यांच्यातील तीन टी-२० सामन्याच्या मालिकेतील पहिला सामना ईडन गार्डन्स, कोलकाता येथे झाला. भारताने नाणेफेक जिंकून क्षेत्ररक्षणाचा निर्णय घेतला होता. विंडीजचे ११० धावांचे लक्ष्य भारताने ५ गड्यांच्या मोबदल्यात पूर्ण करत मालिकेत १-० अशी आघाडी घेतली. विंडीजने प्रथम फलंदाजी करत भारताला ११० धावांचे आव्हान दिले होते. मात्र, भारताची सुरुवात अडखळती झाली. पहिल्याच षटकात कर्णधार रोहीत शर्मा तंबूत परतल्यानंतर भारताने झटपट चार गडी गमावले. दिनेश कार्तिक आणि मनिष पांडे यांनी पाचव्या विकेट्ससाठी केलेल्या ३८ धावांच्या भागिदारीने भारताचा डाव सावरला. मनिष पांडे बाद झाल्यानंतर आंतरराष्ट्रीय क्रिकेटमध्ये पदार्पण केलेल्या कृणाल पांड्याने ९ चेंडूत २१ धावांची झटपट खेळी करत टीम इंडियाला विजय मिळवून दिला. दिनेश कार्तिकने ३१ धावांची झुंझार खेळी केली. भारताने नाणेफेक जिंकून प्रथम क्षेत्ररक्षणाचा निर्णय घेतला. विंडीजच्या डावाची सुरुवात खराब झाली. कुलदीप यादवने प्रभावी मारा करताना १३ धावांत ३ विकेट्स घेत विंडीजच्या फलंदाजीचे तीनतेरा वाजवले. विंडीजने दिलेल्या ११० धावांच्या माफक आव्हानाचा पाठलाग करताना टीम इंडियाची दमछाक झाली. ओशाने थॉमसने रोहित शर्मा, शिखर धवनला तंबूत पाठवले. रिषभ पंतलाही फारशी चमक दाखवता आली नाही. के. एल. राहुल खेळपट्टीवर जम बसवत आहे असे वाटत असतानाच कार्लोस ब्रेथवेटने त्याला बाद केले. दिनेश कार्तिक आणि मनीष पांडे यांनी पाचव्या विकेटसाठी उपयुक्त ३८ धावांची भागिदारी रचली. मनीष पांडे बाद झाल्यानंतर कृणाल पांड्याने खेळाची सूत्रे आपल्या हाती घेत ९ चेंडूत आक्रमक २१ धावांची खेळी साकारली.