सुसाट येणाऱ्या ट्राव्हलर्स कंपनीच्या बसने धडक दिल्याने सायकलस्वार जागीच ठार.

मुलुंड:(शेखर भोसले)कोल्हापूला जाणाऱ्या एका ट्राव्हलर्स कंपनीच्या सुसाट बसने रस्त्याच्या कडेने जाणाऱ्या एका सायकल स्वाराला उडवल्याने सदर सायकलस्वार जागीच ठार झाल्याची घटना गुरुवार दि ५ नोव्हें रोजी रात्रौ ८ च्या सुमारास मुलुंड येथे घडली. मुलुंड पश्चिमेकडील एलबीएस मार्गावरील जॉनसन अँड जॉनसन कंपनीच्या उजव्या बाजूला हा अपघात घडला असून वेगाने बस चालविणाऱ्या बसचालकाला मुलुंड पोलिसांनी भादंवि कलम क्र २८९ आणि ३०४ अन्वये अटक करून गुन्हा दाखल केला आहे. 

मुलुंड-भांडूप लिंक रोड येथील डी मार्ट कंपनीत कामाला असलेला हितेश हरेश्वर ठाकूर (वय ३० वर्षे) हा युवक ड्यूटी संपवून मुलुंड पश्चिमेकडील एलबीएस मार्गावरून नेहमीप्रमाणे सायकलने घरी जात होता. पाठीमागून सुसाट वेगाने येणाऱ्या वैभवलक्ष्मी ट्राव्हलर्सच्या एम एच४८ बीएम ९४०१ या बसने जॉनसन अँड जॉनसन कंपनीजवळ सदर युवकाला पाठीमागून जोरदार धडक दिल्याने सायकलस्वार हितेश ठाकूर याचे जागीच अपघाती निधन झाले. बसचालक बालाप्पा बसप्पा पाटील (वय २९ वर्षे) याला पोलिसांनी तात्काळ अटक केली असून त्याच्यावर भादंवि कलम क्र २८९ आणि ३०४ अन्वये गुन्हा दाखल करण्यात आला आहे. वरिष्ठ पोलिस निरीक्षक रवि सरदेसाई यांच्या मार्गदर्शनाखाली सहा पो.नि.जगन्नाथ शिंदे याप्रकरणी पुढील अधिक तपास करत आहेत. मयत हितेशचे शव त्याच्या कुटुंबियांच्या स्वाधीन करण्यात आले आहे. 

सदर रस्त्यावर मेट्रोचे काम चालू असल्याने रस्ता छोटा झाला आहे त्यातच छेडा पेट्रोल पंप आणि जॉनसन अँड जॉनसन कंपनीच्या मधील रस्त्यावरील सर्व दिवे बंद आहेत. स्थानिकांनी मेट्रोच्या अधिकाऱ्यांकडे व संबंधितांकडे येथील रस्त्यावरील दिवे दुरुस्ती करण्यासाठी अनेक तक्रारी केल्या आहेत परंतु अद्यापपर्यंत कोणीही लक्ष दिले नाही आहे. रस्त्यावर सर्वत्र अंधार असल्याने, येथून रस्त्यावर चालणारे पादचारी, सायकल स्वार वाहनचालकांना दिसत नाहीत त्यामुळेच येथे अपघात घडत असल्याचे स्थानिकांनी सांगितले. पाठीमागून सुसाट येणाऱ्या चारचाकी गाड्या, बसेस, ट्रक, टेम्पो यांच्यामुळे पादचाऱ्यांना, सायकलस्वारांना तसेच दुचाकीस्वारांना जीव मुठीत घेवून प्रवास करावा लागत असल्याने मेट्रो अधिकाऱ्यांनी आणि रस्ते विभागाने एलबीएस मार्गावरील बंद असलेले विजेचे खांब त्वरित दुरुस्त करावेत अशी मागणी यानिमित्ताने स्थानिकांकडून आणि पादचाऱ्यांकडून केली जात आहे.  

रिपोर्टर

  • Adarsh Maharashtra
    Adarsh Maharashtra

    Adarsh Maharashtra is a Digital Media Site. This app is the mobile Version of Adarsh Maharashtra Marathi News Paper. It is 24 hour web news and local news which assure you to show only what is truth, the idea behind Adarsh Maharashtra News to make aware what is happening all over, and to combine advanced news delivery technologies. We are hard working, honest and courages who wants do something for our people and coming generation.

    आदर्श महाराष्ट्र वेब टीम

संबंधित पोस्ट