मुलुंड कॉलनी येथील महावितरणचे सबस्टेशन धोकादायक अवस्थेत
- by Adarsh Maharashtra
- Oct 21, 2020
- 688 views
मुलुंड:(शेखर भोसले)मुलुंड कॉलनी येथील मराठी कॅम्प शाळेच्या जवळील महावितरणचे प्रवाही सबस्टेशन असून त्यात विद्युत ट्रान्सफॉर्मर्स आणि फिडर पिलर्स ठेवण्यात आले आहेत. तसेच यांना जोडणाऱ्या सर्व प्रवाही विद्युत केबल्स देखील उघड्यावरच टाकण्यात आल्या आहे. या सबस्टेशन मधून मुलुंड कॉलनी परिसराला विद्युत पुरवठा केला जातो. सबस्टेशनच्या आत सर्वत्र कचरा व कागद, पुट्टे व इतर ज्वलनशील पदार्थ अस्ताव्यस्त पडले असल्यामुळे संपूर्ण सबस्टेशन अस्वच्छ झाले आहे. तसेच सिमेंटचे पत्रे, केबल्स व इतरही काही वस्तू तेथेच टाकण्यात आल्यामुळे परिसराला डम्पिंग ग्राउंडचे स्वरूप आले आहे.
तसेच सबस्टेशन रूमची संरक्षक भिंत देखील दुरवस्थेत असून मोडकळीस आली आहे त्यामुळे कधीही ही भिंत कोसळू शकते त्यामुळे कोणत्याही प्रकारची सुरक्षितता येथे राहिली नसून कोणीही आतमध्ये ये-जा करत आहेत. कोणतीही सुरक्षा नसल्यामुळे, संरक्षक भिंत शाबूत नसल्यामुळे, सबस्टेशनचे दरवाजे सताड उघडे असल्यामुळे गर्दुल्ले, चरसी, तळीराम आपला कार्यभाग उरकण्यासाठी दिवसाढवळ्या या जागेचा वापर अवैध धंदे करण्यासाठी करत असल्याचे आढळून आले आहे.
संबंधित महावितरण अधिकाऱयांच्या भोंगळ कारभारामुळे तसेच दुर्लक्षामुळे या सबस्टेशनची दुरवस्था झाली असून सर्वत्र अस्वच्छता पसरली आहे. उघड्यावरील विद्युत प्रवाही केबल्स आणि आजूबाजूला पडलेल्या ज्वलनशील वस्तूमुळे येथे असुरक्षितता निर्माण झाली असून एखादी ठिणगी पडून आग लागली तर मोठा अनर्थ घडू शकतो. परिणामी संपूर्ण सबस्टेशन उडण्याची शक्यता परिसरात मोठा आगडोंब उसळू शकतो, अशी भीती या विभागातील सामाजिक कार्यकर्ते अनिल म्हस्के यांनी यानिमित्ताने व्यक्त केली आहे. महावितरणच्या अधिकाऱयांचे या सबस्टेशन कडे लक्षच नसल्यामुळे तसेच नियमितपणे कोणत्याही प्रकारचे मेन्टेनन्स येथे होत नसल्याने भविष्यात अपघात घडून संपूर्ण परिसर अंधारात जावू शकतो अशी शक्यताही अनिल म्हस्के यांनी व्यक्त केली असून महावितरणच्या अधिकाऱयांनी या सबस्टेशनच्या सुरक्षेकडे व स्वच्छतेकडे लक्ष देवून लवकरात लवकर हा परिसर स्वच्छ करून घ्यावा तसेच संरक्षक भिंत नव्याने बांधण्यात यावी अशी मागणी केली आहे.
येथील संरक्षक भिंत लवकरच नव्याने बांधण्यात येणार असून हे सबस्टेशन स्वच्छ करून घेण्यात येईल तसेच सुरक्षिततेसाठी सबस्टेशनचे दरवाजे बंद ठेवण्यात येतील असे महावितरण अधिकाऱयांनी यासंदर्भात सांगितले.
रिपोर्टर
Adarsh Maharashtra is a Digital Media Site. This app is the mobile Version of Adarsh Maharashtra Marathi News Paper. It is 24 hour web news and local news which assure you to show only what is truth, the idea behind Adarsh Maharashtra News to make aware what is happening all over, and to combine advanced news delivery technologies. We are hard working, honest and courages who wants do something for our people and coming generation.
आदर्श महाराष्ट्र वेब टीम