मुंबई, दि. ३० : कर्नाळा पक्षी अभयारण्य आणि फणसाड अभयारण्यातील पर्यटन सुविधांचा विकास करण्यास राज्यशासनाचे प्राधान्य आहे. त्या दृष्टीकोनातून प्रकल्प अहवाल तयार करून महाराष्ट्र इको टुरिझम डेव्हलपमेंट बोर्डकडे तात्काळ पाठवावेत, असे निर्देश वन राज्यमंत्री श्री. दत्तात्रय भरणे यांनी दिले.

फणसाड अभयारण्य, कर्नाळा पक्षी अभयारण्य व माथेरान येथील वनक्षेत्र परिसरातील वनसंवर्धन  ही पर्यटनस्थळे अधिक विकसित करण्याच्यादृष्टीने राज्यमंत्री श्री. भरणे यांच्या अध्यक्षतेखाली व पर्यटन राज्यमंत्री कु. आदिती तटकरे यांच्या उपस्थितीत मंत्रालयात बैठक झाली. यावेळी वन विभागाचे अपर प्रधान मुख्य वन संरक्षक (वन्यजीव) श्री. सुनिल लिमये, वन विभागाचे उपसचिव श्री. गजेंद्र नरवणे  यांच्यासह वन विभागाचे अधिकारी उपस्थित होते.

यावेळी राज्यमंत्री कु. तटकरे म्हणाल्या, नैसर्गिक देणगी लाभलेली ही पर्यटनस्थळे पर्यटकांसाठी पर्यावरणपूरक सोयी-सुविधा, निवास व व्यापक प्रसिद्धी मिळाल्यास कोरोनानंतराच्या काळात पर्यटकांच्या आकर्षणाचे केंद्र ठरतील. रायगड जिल्ह्यातील औद्योगिक विस्तारानुसार दिवसेंदिवस येथील लोकसंख्येत वाढ होत आहे. त्यामुळे येणाऱ्या काळात निसर्ग पर्यटनाला चालना देऊन या अभयारण्यातील आर्थिक उत्पन्नात भर पडण्यास मदत होईल. त्याअनुषंगाने पर्यटकांसाठी पर्यावरणपूरक स्वच्छतागृहे, आहार व राहण्याच्या सोयी उपलब्ध होण्याच्यादृष्टीने उपाययोजना कराव्यात, असे निर्देश त्यांनी यावेळी दिले.

या स्थळांना प्रत्यक्ष भेट देऊन तेथील आराखडा, वनक्षेत्र यांची प्रत्यक्ष पाहणी करुन तसा प्रस्ताव इको टुरिझम बोर्डास सादर करण्यासाठी नियोजनपूर्वक पुढील कार्यवाही करावी, अशा सूचना राज्यमंत्री श्री.भरणे यांनी दिल्या.