मुलुंड :(शेखर चंद्रकांत भोसले)मुलुंड पूर्व येथील महात्मा फुले रोड वरील पत्रा चाळीजवळ असलेल्या किशोर जनरल स्टोअर्स (दुकान क्र U-MUM-35-E-78) या अधिकृत शिधावाटप दुकानातून शिधापत्रिका धारकांना अत्यंत निकृष्ट दर्जाच्या सडक्या व कीड लागलेल्या तूरडाळीचे वाटप करण्यात येत असल्याची तक्रार परिसरातील काही शिधापत्रिकाधारक करताना आढळून येत असून नागरिकांच्या आरोग्याशी खेळणाऱ्या किशोर जनरल स्टोअर्स या शिधावाटप दुकानदारावर कायदेशीर कारवाई करण्यात यावी अशी संतप्त मागणी स्थानिक गोरगरीब रहिवाशांकडून करण्यात येत आहे. 

किशोर जनरल स्टोअर्स या दुकानातून निकृष्ट दर्जाच्या डाळीचे वाटप होत आहे, असा एक व्हाट्सअप मेसेज सर्वत्र वायरल झाल्याने तसेच काही शिधापत्रिकाधारकांनी तक्रार केल्याने त्या अनुषंगाने पत्राचाळीतील किशोर जनरल स्टोअर्सचे या शिधावाटप दुकानात काही सामाजिक कार्यकर्त्यांनी जावून तूर डाळीची तपासणी केली असता ही तूरडाळ अत्यंत निकृष्ट दर्जाची, सडलेली व कीड लागलेली तसेच दमट असल्याचे आढळून आले. या निकृष्ट दर्जाच्या डाळीचेच वाटप सर्वसामान्य नागरिकांना करण्यात येत असल्याचे समजल्यावर दुकान मालक किशोर गणात्रा आणि विशाल गणात्रा यांच्याकडे चौकशी केली असता त्यांनी महाराष्ट्र शासनाच्या अन्न पुरवठा विभागाची बदनामी करत शासनच आम्हांला अशी निकृष्ट दर्जाची डाळ पाठवते असे सांगितले व जे शासनाकडून येते तेच आम्ही शिधापत्रिकाधारकांना देतो असे सांगितले. 

परंतु एकंदरीत हा दुकानदार खोटे बोलत असल्याचे स्थानिकांनी सांगितले. सडकी, कीड लागलेली, भिजलेली निकृष्ट दर्जाची डाळ गरीब शिधापत्रिकाधारकांना देवून गरीबांच्या जीवाशी हा रेशन दुकानदार खेळत असून ही निकृष्ट डाळ खावून गरीबांचा जीव जावू शकतो त्यामुळे दुकानदाराने या डाळीचे वाटप करण्याऐवजी अन्न पुरवठा खात्याच्या रेशनिंग अधिकाऱ्यांना कळवून ही सडकी  डाळ वाटणे थांबवून ग्राहकांच्या  आरोग्याशी खेळणे थांबवले पाहिजे, असे नागरिकांनी संतप्त स्वरात मागणी केली असून निकृष्ट दर्जाच्या कीड लागलेल्या डाळीचे वाटप करत असल्याबद्दल किशोर जनरल स्टोअर्स या शिधावाटप दुकानदारावर कडक कारवाई करुन या दुकानाला सील करावे अशी आग्रही मागणी या संतप्त शिधापत्रिकाधारकांनी केली आहे.  

सुरवातीला विशाल गणात्रा यांनी आपले खरे नाव लपवून ठेवून शैलेश भानुशाली अशी स्वतःची ओळख सांगितली नंतर त्याचे वडील किशोर गणात्रा यांनी खरे नाव सांगितले. निकृष्ट दर्जाचा माल गोरगरिबांना देत असल्यामुळे मीडियामध्ये आपली बदनामी होवू नये यासाठी खोटे नाव सांगितल्याचे विशाल गणात्रा यांनी सांगितले. 

शासकीय रेशन अधिकाऱ्यांशी संपर्क साधण्याचा प्रयत्न केला असता त्यांचा संपर्क होवू शकला नाही परंतु शासनाकडे देखील यासंबंधीची अधिकृत तक्रार करण्यात येणार असल्याचे काही जागरूक नागरिकांनी सांगितले.