मुलुंड(शेखर चंद्रकांत भोसले)मुलुंड पश्चिमे कडील रिचर्डसन अँड क्रुडास या कंपनीच्या २० एकर परिसरात सिडकोतर्फे बांधण्यात आलेल्या १६५० बेडच्या कोविड उपचार केंद्राचे ७ जुलैला मुख्यमंत्री उद्धव ठाकरे यांच्या हस्ते ऑनलाईन लोकार्पण करण्यात आल्यानंतर पुढील ५ दिवसांत हे उपचार केंद्र चालू करण्यात येईल असे सिडको व पालिकेच्या वतीने जाहिर करण्यात आले होते परंतु लोकार्पण सोहळ्यानंतर ८ दिवस होवून गेले तरी येथील कोविड उपचार केंद्र नागरिकांसाठी अद्याप सुरू न झाल्याने पालिकेच्या ढिसाळ कारभाराविरुध्द नागरिक संताप व्यक्त करताना दिसत असून रुग्ण भरती लगेच सुरू करायची नव्हती तर उद्धाटनाची घाई पालिकेने केलीच कशाला अश्या प्रकारचे प्रश्न नागरिक विचारत आहेत तसेच सिडको आणि पालिकेच्या अनागोंदी कार्यपद्धतीविरुध्द नाराजी व्यक्त करताना दिसत आहेत. 

मुलुंड, भांडूप व ठाणे परिसरातील कोरोनाबाधितांच्या वाढत्या संख्येमुळे मुलुंडमधील रिचर्डसन अँड क्रुडास येथील कोविड उपचार केंद्र जूनमध्येच बांधून तयार झाले होते परंतु इतर सोयी सुविधा, वैद्यकीय उपकरणांची व वैद्यकीय कर्मचाऱ्यांच्या जुळवाजुळवीमुळे ३० जूनला ह्याचे लोकार्पण करण्याचे ठरविण्यात आले होते परंतु काही गोष्टींची पूर्तता होणे बाकी राहिल्याने अखेर ७ जुलैला मुख्यमंत्र्यांच्या हस्ते याचे ई-लोकार्पण करण्यात आले. 

मात्र लोकार्पण होवून ८ दिवस झाले तरी रुग्ण भरती करण्यास सुरुवात न झाल्याने परिसरातील स्थानिक कोरोना रुग्णांना व रुग्णांच्या नातेवाईकांना इतरत्र बेडच्या उपलब्धतेसाठी फिरावे लागत आहे त्यामुळे स्थानिक नागरिक हैराण झाले असून पालिका प्रशासनाच्या अनागोंदी कारभारा विरूद्ध संताप व्यक्त करताना दिसत आहे. विविध पक्षांचे कार्यकर्ते व स्थानिक भाजपा आमदार मिहीर कोटेचा यांनी देखील विरोध नोंदविला असून हे सेंटर कधी कार्यान्वित होणार असा प्रश्न उपस्थित केला आहे. 

या कोविड सेंटरचे प्रमुख वैद्यकीय अधिकारी डॉ प्रदीप आंग्रे यांच्याशी यासंदर्भात चर्चा केली असता त्यांनी सांगितले की, 'उद्यापासून हे कोविड सेंटर कोरोनाची सौम्य लक्षणे असलेल्या रुग्णांसाठी सुरू करण्याचा विचार असून यासंदर्भात वरिष्ठ अधिकाऱ्यांशी चर्चा करुन निर्णय घेण्यात येणार आहे. सुरुवातीला कमी रुग्ण घेण्यात येणार असून कालांतराने रुग्ण संख्येत वाढ केली जाणार आहे. सौम्य लक्षणे असलेले साधारण ३५० पर्यंत रुग्ण पुढील काही दिवसांत येथे भरती केले जावू शकतात.वैद्यकीय कर्मचाऱ्यांची जुळवाजुळव करण्यात वेळ गेला परंतु सध्या २० ते २५ डॉक्टर्स व १५ ते २० नर्सेस ऊपलब्ध आहेत तसेच इतर पॅरामेडिकल स्टाफ देखील योग्य प्रमाणात ऊपलब्ध आहे. त्यामुळे वरिष्ठांची परवानगी मिळाली तर हे कोविड उपचार केंद्र उद्यापासून चालू करण्यास काहीही अडचण नाही आहे. डायलिसिस व आईसीयू सेंटर उभारणीला वेळ जाणार असून त्याचे काम सुरू झाले असून इतर काही अडचणी नाही आल्या तर पुढील २५ दिवसांत या दोन्ही सुविधा रुग्णांसाठी ऊपलब्ध असतील'.