डोंबिवली (श्रीराम खंडू) : कोरोना महामारीच्या पार्श्वभूमीवर लॉकडाऊन केल्यानंतरही सार्वजनिक ठिकाणी नियमांचे सर्रास उल्लंघन करण्यात येत असल्याने कोरोनाचा प्रादुर्भाव वाढत चालला आहे. अखेर नियमांचे उल्लंघन करणाऱ्या डबलसीट दुचाकीस्वारांसह रिक्षा आणि चारचाकी अशा तब्बल ४५००  वाहनांवर वाहतूक नियंत्रण शाखेच्या कल्याण-डोंबिवलीतील युनिटने रविवारी दिवसभरात कारवाईचा बडगा उगारला. या कारवाईत तब्बल ४५० विविध प्रकारची वाहने जप्त करण्यात आली आहेत.
     
कोरोनाचा वाढत प्रादुर्भाव आणि प्रसार टाळण्यासाठी कल्याण-डोंबिवली महानगरपालिका आणि पोलिस प्रशासनाकडून विविध योजना राबवल्या जात आहे. यासाठी पोलिसांनी कडक कारवाईला सुरुवात देखील केली होती. वाढत्या कोरोनामुळे २ तारखेपासून कल्याण-डोंबिवली महानगरपालिकाने लॉकडाऊन जाहीर केला हा लॉकडाऊन १२ तारखेपर्यंत ठेवण्यात आला होता. मात्र रुग्णांची संख्या वाढत असल्याने हा लॉकडाऊन १९ तारखेपर्यंत वाढवण्यात आला आहे. केडीएमसीच्या लॉकडाऊनमध्ये पोलिसांनी फिजिकल डिस्टनसिंगचे पालन न करणारे, तोंडाला मास्क न लावणारे, डबल सीट फिरणारे, विनाकारण रस्त्यावर फिरणारे भटके आणि वाहतूक नियमांचे पालन न करणारे वाहन चालक अशा एकूण ४  हजार ५०० जणांवर कारवाया केल्या. तर ४५० दुचाकी आणि चारचाकी वाहने जप्त केली आहेत. या आधीही नागरिकांना वारंवार आवाहन करूनही नियमांचे उल्लंघन केले जात असल्यामुळे पोलिसांनी कठोर कारवाईचा बडगा उगारला आहे. आता १९ तारखेपर्यंत ही कारवाई अशीच सुरू राहणार असल्याची माहिती शहर वाहतूक नियंत्रण शाखेचे सहाय्यक पोलिस आयुक्त दिलीप उघडे यांनी दिली