मुलुंड : (शेखर चंद्रकांत भोसले l राज्य सरकारने केशकर्तनालयांना परवानगी दिल्यानंतर सुमारे सव्वा तीन महिन्यांनी रविवार दि २८ जून रोजी मुलुंडमधील सलून पुन्हा सुरू करण्यात आली असून पहिल्याच दिवशी ग्राहकांकडून मोठा प्रतिसाद मिळाल्याने दुकाने सुरू झाल्यापासून बंद करेपर्यंत दुकानातील कारागिरांना थोडी देखील उसंत मिळाली नसल्याचे आढळून आले आहे.

मुलुंड पूर्व येथे राज हेअर कटिंग सलूनची दुकाने आहेत. स्थलांतरित मजूर गावी गेल्याने या दुकानात केस कर्तन करण्यासाठी कारागिरांची संख्या निम्म्यावर होती. त्यामुळे अनेक ग्राहक बाहेर सोशल डिस्टेन्स ठेवून वेटिंग मध्ये उभे असलेले दिसून आले. ग्राहकांच्या आणि कारागिरांच्या सुरक्षितते साठी दुकान मालकाने अनेक उपाययोजना केलेल्या आढळून आल्या. थर्मल टेम्परेचर स्कॅनिंग मशीनने ग्राहकांचे तापमान तपासण्यात येत होते तर बाहेर ठेवलेल्या सॅनिटायझरने हात स्वच्छ साफ केल्यानंतरच आत प्रवेश दिला जात होता. कोरोना काळाच्या पूर्वी, अनेक ग्राहकांना वापरल्या जाणाऱ्या अंगावरील कपड्यांच्या जागी आता प्रत्येक ग्राहकासाठी नवीन कपडा वापरला जात होता व वापरलेला कपडा वॉशिंग मशीनमध्ये धुवायला टाकला जात होता. डिस्पोज़ेबल कपड्यांची ऑर्डर दिली असून लवकरच ते येतील असे मुलुंड मधील काही सलून वाल्यांनी सांगितले. केश कर्तनासाठी वापरण्यात येत असलेल्या कैच्या, कंगवे, वस्तरा इत्यादी साहित्यांचे वारंवार सॅनिटायझेशन केले जात होते. तसेच ग्राहकांनी खुर्चीवर बसण्याआधी आणि केस कापून उठल्यानंतर सॅनिटायझर वापरून खुर्च्याचे निर्जन्तुकीकरण केले जात होते. 

कारागिर देखील मास्क वापरून केस कापताना दिसत होते आणि एकावेळी दोनच ग्राहक दुकानात असतील याची काळजी घेतली जात होती. मुलुंड मधील काही दुकानदारांनी दुकानासमोरील गर्दी टाळण्यासाठी ग्राहकांना आगाऊ नोंदणी करणे बंधनकारक केले असून नोंदणी केलेल्या ग्राहकांना वेळ दिली जात होती. ग्राहक संख्या वाढल्यामुळे काही ग्राहकांना दोन ते तीन दिवसानंतरची वेळ मिळाली असल्याची माहिती ग्राहकांनी व दुकान मालकांनी दिली. 

कोरोनाच्या पार्श्वभूमीवर सॅनिटायझर, मास्क, अप्रोण आणि इतर सुरक्षा साधनांसाठी मोठा खर्च सलून मालकांना करावा लागत असल्याने केस कापण्याचे दर वाढविण्यात आले असल्याचे दिसून आले. पूर्वी १०० रूपये केस कापण्यासाठी घेतले जायचे तेथे आता १५० रूपये आकारण्यात येत असल्याचे दिसून आले. खर्च वाढल्याने ही वाढ करण्यात आली असे सलून मालकांनी सांगितले.