मुंबई दि .१५ जून :मुंबईच्या महापौर किशोरी पेडणेकर यांनी आज  जी /दक्षिण विभाग कार्यालयाला भेट देऊन विभागातील विविध समस्यांचा सहाय्यक आयुक्तांकडून आढावा घेतला. तसेच नव्याने विभाग कार्यालयात स्थापन झालेल्या  वाँर रूमची पाहणी केली.  पावसाळ्याच्या दिवसात विविध साथीचे आजार लक्षात घेता घनकचरा व्यवस्थापन खात्याने संपूर्ण विभागाची साफसफाई करावी तसेच कीटकनाशक विभागाने फवारणी कामाला सर्व विभागात तातडीने सुरुवात करावी असे निर्देश महापौरांनी सहाय्यक आयुक्तांना दिले. या संपूर्ण कामाची सुरुवात महालक्ष्मी येथील धोबीघाट पासून करण्याचे निर्देशही महापौरांनी यावेळी दिले. गतवर्षी ज्याठिकाणी मलेरिया व डेंगूच्या केसेस आढळून आल्या आहेत, त्याठिकाणी अधिक लक्ष केंद्रित करण्याचे निर्देश महापौरांनी यावेळी दिले.  नगरसेवक आशिष चेंबूरकर यांनी पोलीस मैदानात कोरोना बाधित रुग्णांसाठी विलगीकरण कक्ष उभारण्याची मागणी महापौरांकडे केली.  महापौरांनी पोलीस मैदान येथे पोलिसांसाठी तातडीने विलगीकरण कक्ष सुरू करण्याचे निर्देशही  यावेळी सहाय्यक आयुक्तांना दिले. मलेरियाची उत्पत्तीस्थाने नष्ट करण्यासाठी जी /दक्षिण विभागासोबतच संपूर्ण मुंबईत ड्रोन कॅमेराद्वारे फवारणी करण्याचे निर्देश महापौरांनी यावेळी दिले.                  

            वॉर रूमची पाहणी                      महापौरांनी विभाग कार्यालयात स्थापन करण्यात आलेल्या वॉर रूमची पाहणी केली. महापौर किशोरी पेडणेकर यांनी या ठिकाणी कार्यरत असलेल्या सर्व कर्मचाऱ्यांसोबत संवाद साधला. कर्मचाऱ्यांनीही यावेळी दैनंदिन कामांचा अनुभव तसेच कार्यपद्धती महापौरांना विशद केली. महापौर कर्मचाऱ्यांशी संवाद साधताना  म्हणाल्या की, प्रसारमाध्यमातून येणाऱ्या  बातम्यांचे अवलोकन करून रुग्णवाहिका तसेच बेडची उपलब्धता याबाबत अधिक दक्षतेने लक्ष ठेवून नोंदी ठेवा. त्याचप्रमाणे विभागातील खासगी रुग्णालयांशी समन्वय ठेवून त्यांच्याकडील उपलब्ध बेड, कोरोना  रुग्णांची सद्यस्थिती याची वेळोवेळी माहिती घेण्याचे निर्देशही महापौरांनी यावेळी संबंधित कर्मचाऱ्यांना दिले.आपण जे काम करीत आहोत त्या कामाचा लाभ बाहेरील लोकांना मिळाला पाहिजे, याबाबत नेहमीच दक्ष राहण्याची सूचना महापौरांनी यावेळी सर्व संबंधित कर्मचाऱ्यांना केली.