मुंबई  (जीवन तांबे )झी एंटरटेन्मेंट एंटरप्रायझेस लिमिटेड (झी) या प्रसिद्धी आणि मनोरंजन क्षेत्रातील आघाडीच्या कंपनीने कोविड-19 विरोधातील लढा अधिक तीव्र करत संपूर्ण देशभरात त्यांच्या एकंदरीत प्रोडक्शन कामकाजा मध्ये प्रत्यक्ष तसेच अप्रत्यक्षरीत्या काम करणाऱ्या 5000 पेक्षा अधिक असलेल्या रोजंदारी कामगारांना आर्थिक साहाय्य  देण्याची घोषणा केली होती.

त्या शब्दाला जागत आर्थिक मदतीची रक्कम कामगारांच्या बँक खात्यांमध्ये जमा केली आहे. रोजंदारी कामगारांच्या अनेक कुटुंबांनी ‘झी' च्या मदतीचे मनापासून कृतज्ञता व्यक्त केली आहे.

आजारपणातील खर्च, खाद्यपदार्थ, किराणा सामान, मुलांचे शिक्षण, रोजच्या गरजा अशा अनेक बाबतीत या आर्थिक मदतीमुळे या कामगारांच्या कुटुंबांना खूप मोठा दिलासा मिळाला आहे.  

'रात्रीस खेळ चाले' या झी मराठीवरील मालिकेचे स्पॉट बॉय श्री. मारुती मगदूम यांनी पाठवलेल्या अतिशय हृदयस्पर्शी व्हिडिओ संदेशात म्हटले आहे की, "सध्याच्या अस्थिर परिस्थितीमध्ये माझ्या आजूबाजूच्या लोकांचे रोजगार बंद पडले, मला आणि माझ्या कुटुंबाला आमचे रोजचे खर्च भागवणे देखील कठीण होऊन बसले.  मी 'झी' चा मनापासून आभारी आहे की त्यांनी आपले वचन पाळले आणि मला आर्थिक मदत पाठवली."

मराठी सिने उद्योगातील ज्येष्ठ निर्माते श्री.महेश कोठारे म्हणाले, "कोविड-१९ मुळे टीव्ही कार्यक्रमांच्या निर्मितीचे काम पूर्णपणे बंद पडले आहे, यामुळे आमच्यासोबत काम करणाऱ्या रोजंदारी कामगारांच्या जीवनावर खूप मोठा परिणाम होत आहे. अशा आव्हानात्मक परिस्थितीमध्ये देखील 'झी'ने पुढाकार घेऊन या रोजंदारी कामगारांच्या डोक्यावरील आर्थिक भार कमी करण्यात मदत केली आहे." 

कोविड-१९ विरोधातील लढ्यामध्ये सहभागी होण्यासाठी जगभरातील प्रेक्षकांना आवाहन करण्यासाठी कंपनीने आपली टेलिव्हीजन चॅनेल्स, डिजिटल प्लॅटफॉर्म्स आणि सोशल मीडिया प्लॅटफॉर्म्सचा वापर केला आहे. एप्रिल महिन्यात 'झी'ने आपल्या ३४०० पेक्षा जास्त कर्मचाऱ्यांना पीएम केयर्स फंडामध्ये एका इंट्रानेट पोर्टलद्वारे स्वेच्छेने योगदान देण्याचे आवाहन केले होते.  कर्मचाऱ्यांकडून जमा झालेल्या रकमेइतकी रक्कम कंपनीने देखील दिली आणि ही एकूण रक्कम पीएम केयर्स फंडमध्ये जमा करण्यात आली. सामाजिक जबाबदारीचे भान राखून काम करणारी प्रसिद्धी आणि मनोरंजन कंपनी 'झी' ने प्रेक्षकांना देशातील, जगातील घडामोडींची नीट माहिती देण्यावर तसेच त्यांचे मनोरंजन करण्यावर सर्वाधिक भर देण्यात आला आहे.