मुंबई: 30, मे (क्री. प्र.), सध्या कोरोना जगभरात धुमाकूळ घालत असून या विषाणूने वंश, जात, पात, पंथ, वर्ण, धर्म, देश यांच्या सर्व सीमा ओलांडल्या आहेत. भारतात सुध्दा कोरोनाने सर्वांना साळो की पळो करून सोडण्यास सुरवात करण्यापूर्वीच आपल्या सरकारने त्यावर योग्य असे उपाय करण्यास सुरवात केली आहे. खरतर महाराष्ट्र सरकारचे कौतुक करताना मा. मुख्यमंत्री उध्दव ठाकरे, मा. उपमुख्यमंत्री अजितदादा पवार, मा. आरोग्यमंत्री राजेश टोपे व मा. गृहमंत्री अनिल देशमुख या सर्वांचे मार्गदर्शक मा. खासदार शरदचंद्रजी पवार साहेब महाराष्ट्राला व मा. पंतप्रधान नरेंद्र मोदी देशाला सावरण्यासाठी जोरदार प्रयत्न करत आहेत.

या पार्श्वभूमीवर समजीतील विविध संस्था, व्यक्ती कोरोना विरोधात लढण्यासाठी आर्थिक मदत जाहीर करत आहेत. या सर्व गोष्टींचे भान ठेवून महाराष्ट्र खो-खो असोसिएशनचे अध्यक्ष संजीवराजे नाईक – निंबाळकर, भारतीय खो खो महासंघाचे सहसचिव चंद्रजीत जाधव, कार्याध्यक्ष-सचिन गोडबोले, सरचिटणीस-ॲड. गोविंद शर्मा, खजिनदार-ॲड. अरुण देशमुख यांच्या संमतीने महाराष्ट्र खो-खो असोसिएशन कडून कोरोना विषाणू संसर्गाविरोधात लढण्यासाठी मुख्यमंत्री सहाय्यता निधिला रु. 1,11,111/- (रु. एक लाख अकरा हजार एकशे अकरा फक्त) चा धनादेश देण्याचे ठरले होते.

आज महाराष्ट्र खो-खो असोसिएशनचे सरचिटणीस-ॲड. गोविंद शर्मा यांनी उद्योग मंत्री व औरंगाबादचे पालकमंत्री मा. ना. सुभाष देसाई यांच्याकडे सुपूर्द केला. यावेळी आमदार अंबादास दानवे व माजी खासदार चंद्रकांत खैरे यांच्या सोबत बरेच खो-खो  कार्यकर्ते उपस्थित होते.