मुंबई :( जीवन तांबे ) चेंबूर येथील वाशीनाका भारत नगर जवळील म्हाडा वसाहतीत काही गर्दुल्ल्यांनी हैदोस घातला असून इमारतीच्या शेजारील रस्त्यांवर उभ्या असलेल्या अनेक वाहनांची तोडफोड केली.  संचारबंदीच्या काळात गर्दुल्ले अश्याप्रकारे रस्त्यावर येऊन तोडफोड करत असल्याने लोकांच्या सुरक्षतेचा प्रश्न निर्माण झाला आहे.

   वाशीनाका भारतनगर जवळील जे प्लॉट येथे प्रकल्पग्रस्तांच्या मोठ्या प्रमाणात इमारती आहेत. सध्या या ठिकाणची लोकसंख्या हजारोच्या घरात आहे. विविध भागातून प्रकल्पग्रस्त या ठिकाणी आल्याने त्यामध्ये काही गुंडप्रवृत्तीची इसम देखील आहेत. मोकले मैदान व निर्जन ठिकाणी या गुंडप्रवृत्तीच्या लोकांनी आपला अड्डा बनवला आहे. अंमली पदार्थाचे सेवन करून ते बिनधास्तपणे लोकवस्तीत वावरत असतात. अनेकवेळा त्यांच्यात हाणामारी होतात परिणामी एकमेकांना मारण्यासाठी नंग्या तलवारी देखील काढतात. याचा सर्वात जास्त त्रास सर्वसामान्य लोकांना होत आहे. काही मूठभर गुंडामुळे संपूर्ण म्हाडा वसाहत दहशतीखाली राहत आहे. पोलीस या गर्दुल्ल्यांवर ठोस अशी कारवाई करत नाही. 

सध्या देशभर संचारबंदी चालू असून अत्यावश्यक कारणांसाठीच बाहेर पडण्याची परवानगी आहे. मात्र या ठिकाणी गर्दुल्ल्यांचा सर्रास वावर पाहायला मिळत आहे. पोलीस आपले काहीही करू शकत या तोऱ्यात या संपूर्ण परिसर दहशतीखाली ठेवला आहे. दोन दिवसांपूर्वी त्यांनी या भागातील अनेक वाहनांची तोडफोड केली. यामध्ये खाजगी वाहने, रिक्षा, टॅक्सी यांचा समावेश आहे. सध्या संचारबंदी असताना रिक्षा - टॅक्सी चालकांचा व्यवसाय बंद आहे. दिवसभर धंदा करून आपल्या कुटुंबीयांचा उदरनिर्वाह करणाऱ्या रिक्षा - टॅक्सी चालकांवर सदगत उपासमारीची वेळ आली आहे. त्यातच हे गर्दुल्लेरस्त्यावर उभ्या असलेल्या वाहनांची तोडफोड करत असल्याने त्याच्या दुरुस्तीसाठी पैसे आणायचे कुठून? असा प्रश्न त्यांच्यासमोर पडला आहे