मुंबई :( जीवन तांबे )एकीकडे कोरोनाने थैमान या कोरोनाने पनवेल ही सोडलेले नाही.सरकारने महाराष्ट्र लॉकडॉऊन केला आसताना देखील पनवेल येथील तक्का परिसरातील भाजप नगरसेवक आपला वाढदिवस साजरा करीत सरकारचे नियम पायदळी तुडविल्याने त्याना सह दहा जणांना अटक केली आहे.

पनवेल परीसरात एकूण 21 कोरोना बाधित रुग्ण सापडले असल्याने काल रात्री तक्का येथील भारतीय जनता पार्टीचे नगरसेवक अजय बहिरा यांनी सामाजिक संवेदना आणि कायदा पायदळी तुडवून धुमधडाक्यात वाढदिवस साजरा केला. 

याबाबत शहर पोलिसांना माहिती मिळताचा त्यांनी येऊन नगरसेवकांसह अन्य दहा जणांना फरफटत पोलिस ठाण्यात नेले. त्यांच्याविरुद्ध गुन्हा दाखल केला आहे.

प्रभाग क्रमांक वीसचे भाजपा नगरसेवक अजय बहिरा यांचा काल वाढदिवस होता. देशात सगळीकडे कोरोनाचे ग्रहण लागले आहे.

तक्का येथील नगरसेवक अजय बहिरा यांनी त्यांचा वाढदिवस साजरा करण्यासाठी त्यांच्या इमारतीच्या टेरेसवर जंगी पार्टीचे आयोजन करून मित्रांना आमंत्रण दिले होते. पोलिस आयुक्तांनी घोषित केलेला जमाव बंदीचा 144 कलम आणि राज्य शासनाने सक्तीने केलेला साथी रोग कायद्याची चिरफाड करत या महाभागाने खास पार्टी आयोजित करून सत्तेची मस्ती कशी माणसाला राक्षस बनवते ते दाखवून दिले. 

विशेष म्हणजे कालच महापालिका क्षेत्रातील खारघर येथील 33 वर्षीय तरुणाचा कोरोनाने बळी घेतला असताना पार्टी ठेऊन आनंद लुटत होते.  या पार्टीसाठी खास वीस किलो कोळंबीचा जेवणात बेत केला होता आणि ओली पार्टीही केल्याची माहिती समोर आली आहे. 

शहर पोलिस ठाण्याचे कडक शिस्तीचे धाडसी वरिष्ठ पोलिस निरीक्षक अजयकुमार लांडगे यांना माहिती मिळताच त्यांच्या पथकाने बहिरा यांच्या सोहळ्याचे व्हिडिओ चित्रण केले आहे. त्यानंतर भक्कम पुराव्यांसह 11 जणांना फरफटत नेले. त्यांच्याविरुद्ध गुन्हा दाखल केला आहे.

आमदारठाकूर,बहिरांची 

हकालपट्टी करणार का? 

साथीरोग सुरू असताना शासनाच्या आदेशाची खिल्ली उडवून सत्तेचा माज दाखवत नागरिकांच्या भावनांची थट्टा उडवणाऱ्या भाजपा नगरसेवक अजय बहिरा यांची पक्षातून हकालपट्टी करून त्यांच्या नगरसेवकपदाचा राजीनामा भाजपा जिल्हाध्यक्ष असलेले आ. प्रशांत ठाकूर मागतील की त्याला पाठीशी घालतात की त्यांना साथ देतात यात त्याची कसोटी पाहायला मिळणार आहे