मुंबई   :  कोरोना व्हायरसच्या पार्श्वभूमीवर देशात लाॅकडाऊन करण्यात आले आहे. यामुळे लोक सामान खरेदीसाठी बाजारात गर्दी करत आहेत. दादर सेनापती बापट मार्गावर असलेल्या अनधिकृत फेरीवाल्यांकडून भाजीपाला खरेदीसाठी होणारी गर्दी लक्षात घेता येथील अनधिकृत भाजीपाला विक्रेत्यांना होणाऱ्या माल सप्लायवर बंदी घातली आहे. त्यामुळे आता याठिकाणी ट्रॅक चालकांना माल घेऊन येण्यास बंदी केली असून ट्रॅकचालकांना वांद्रे एमएमआरडीए मैदान, घाटकोपर,  दहिसर, मुलुंड या ठिकाणी  मालाची डिलीव्हरी करण्याचे आदेश दिल्याचे पालिका मार्केट विभागाचे अधिकारी प्रशांत गायकवाड यांनी सांगितले. या निर्णयामुळे या ठिकाणी होणारी गर्दी टाळता येऊ शकते,  असेही ते म्हणाले. 

दादर पश्चिम येथे सेनापती बापट मार्गावर भाजी मार्केट आहे. याठिकाणी घाऊक स्वस्त भाजी मिळत असल्याने मुंबईच्या कानाकोपऱ्यातील ग्राहक भाजी खरेदीसाठी येथे गर्दी करतात. सध्या कोरोनाने थैमान घातले असताना गर्दी टाळने हाच उपाय आहे. भाजी विक्रेत्यांकडे होणारी गर्दी कमी करण्यासाठी घाटकोपर ते माटुंगा येथील व्यापाऱ्यांसाठी सोमय्या मैदान येथे, वांद्रे ते गोरेगाव येथील व्यापाऱ्यांसाठी एमएमआरडीए एक्झिबिशन मैदान येथे, मुलुंड ते घाटकोपर येथील व्यापाऱ्यांसाठी मुलुंड जकात नाका येथे,  दहिसर ते मालाड येथील व्यापाऱ्यांसाठी दहिसर चेक नाका येथे तर मुंबई शहर विभागातील व्यापाऱ्यांसाठी सध्या दादर येथील पालिकेच्या क्रांतिसिंह नाना पाटील मंडई येथील भाजी मार्केटच्या ठिकाणी व्यवस्था करण्यात आली आहे. ही व्यवस्था पुढील आदेश मिळेपर्यंत सुरू राहणार आहे, असल्याचे ते म्हणाले. 

पालिकेच्या मार्केटमधून थेट डिलीव्हरी अशक्य

मुंबई महापालिकेची ५५ भाजीपाला मार्केट असून त्या ठिकाणी ४ हजारांहुन अधिक दुकानदार आहेत. परंतु मुंबईची लोकसंख्या सव्वा कोटींच्या घरात गेली आहे. त्यामुळे ५५ माकेर्टमधील चार हजार दुकानदारांना थेट ग्राहकाच्या घरी भाजीपाल्याची डिलीव्हरी करणे शक्य होणार नाही. त्यामुळेच आताच्या कोरोना विषाणूचा प्रादुर्भाव रोखण्यासाठी रोखण्यासाठी शेतकऱ्यांना थेट सोसायट्यांमध्ये डिलीव्हरी करण्याची योजना राबवत असल्याचे गायकवाड यांनी सांगितले