मुंबई: तमाशा कलावंत काळूबाळू या दुकलीने आपल्या अभिनयाने तमाशा लोकप्रिय केला होता. त्याचप्रमाणे मुंबई महापालिका वर्तुळात प्रसिद्ध असलेली आणि भ्रष्टाचारात पारंगत असलेली मनपाची ‘काळूबाळू’ जोडी  'राही आणि ढोले' यांची एकाच विभागात वर्णी असल्यामुळे 'बी' विभागातले अधिकारी आणि कर्मचारी चांगलेच धास्तावले आहेत. राजेश ढोले  हे मालाड येथे कार्यरत असताना २००८ साली त्यांना  ७ लाखाची लाच घेताना लाचलुचपत प्रतिबंधक विभागाने अटक केली होती.

लाचखोरीच्या प्रकरणात अटक झाली असताना सुद्धा 'डी' विभागात अपील अधिकारी पदावर नियुक्ती करण्यात आली होती. अपील अधिकारी म्हणून त्यांचा कार्यकाल सुद्धा वादग्रस्त ठरला होता. तक्रारदारांशी मुजोरपणे वागणारा ,माहिती दडपण्यात पटाईत असणारा आणि महिलांशी असभ्य वर्तन करणारा अधिकारी अशी ख्याती ढोलेची आहे. अशा वागणुकींमुळे ढोले विषयी 'डी' विभागात असंतोष निर्माण झाला होता. ढोले विषयी अनेक तक्रारी प्रलंबित असताना  आता त्यांना 'बी' विभागात पदनिर्देश अधिकारी म्हणून बढती कशी देण्यात आली? असा सवाल इतर प्रामाणिक अधिकारी करीत आहेत.

'बी' विभागाचे सहाआयुक्त विवेक राही हे आधीच भ्रष्टाचाराचे महामेरू म्हणून महापालिका वर्तुळात ओळखले जातात. आता त्यांच्या जोडीला भ्रष्टाचारात पीएचडी केलेला अधिकारी आल्याने या काळूबाळूच्या जोडीने  'बी' विभागातील अधिकाऱ्यांनी आणि नागरिकांनी चांगलीच धास्ती घेतल्याचे  चित्र दिसत आहे.

लाचखोर अधिकाऱ्याला बढती; महापालिका आयुक्त अजोय मेहता यांच्या कार्यशैलीवर प्रश्नचिन्ह

राजेश ढोले सारख्या भ्रष्ट आणि मुजोर अधिकाऱ्याला महापालिकेने बक्षीस म्हणून बढती दिल्याने महापालिका आयुक्त अजोय मेहता यांच्या कार्यशैलीवर प्रश्नचिन्ह उभे राहिले आहे. लाचखोरीच्या प्रकरणात अटक झालेल्या अधिकाऱ्याला बढती दिल्याने मनपा विभागात प्रामाणिकपणे काम करणाऱ्या अधिकाऱ्यांचे खच्चीकरण होत असल्याची खंत  एका अधिकाऱ्यांने (नाव न सांगण्याच्या अटीवर) आदर्श महाराष्ट्रशी बोलताना व्यक्त केली.