कर्मचारी संपावर ठाम असल्यानं कोंडी फुटण्याची शक्यता कमी आहे. त्यामुळं प्रशासनानं आता कारवाईचा बडगा उगारला आहे. बेस्ट कर्मचारी वसाहतीत राहणाऱ्या कर्मचाऱ्यांना घरं खाली करण्याच्या नोटिसा पाठवण्यात आल्या आहेत. 'कोणत्याही पूर्वसूचनेशिवाय आपण कामावर गैरहजर राहिला आहात. आपण पुकारलेला संप बेकायदा आहे. त्यामुळं बेस्ट वसाहतीतील आपलं घर खाली करावं, असं नोटिशीत म्हटलं आहे. नोटिशीपाठोपाठ भोईवाडा येथील बेस्ट वसाहतीत बेस्टचे सुरक्षा अधिकारी व पोलीसही दाखल झाले आहेत.

विविध प्रलंबित मागण्यांसाठी कालपासून संपावर गेलेल्या बेस्ट कर्मचाऱ्यांच्या मागण्यांबाबत बेस्ट प्रशासनानं ताठर भूमिका घेतली असून बेस्ट वसाहतीत राहणाऱ्या कर्मचाऱ्यांना घरं खाली करण्याच्या नोटिसा पाठवण्यात आल्या आहेत. प्रशासनाच्या या नोटिसांमुळं कामगारांमध्ये संतापाचं वातावरण असून संप आणखी चिघळण्याची चिन्हे आहेत. वेतनवाढ, वेळेवर वेतन तसंच, बेस्टचा अर्थसंकल्प महापालिकेच्या अर्थसंकल्पात विलीन करण्यात यावा अशा मागण्यांसाठी बेस्ट कामगार कृती समितीनं मंगळवारपासून संपाचं हत्यार उपसलं आहे. शिवसेनाप्रणित कामगार सेना संपातून बाहेर पडल्यानंतरही कालपासून एकही बेस्ट बस रस्त्यावर धावलेली नाही. त्यामुळं मुंबईकरांचे हाल होत आहे. संपावर तोडगा काढण्यासाठी प्रशासन व कामगार संघटनांमध्ये बैठकांच्या फेऱ्या सुरू आहेत. मात्र, अद्याप तोडगा निघालेला नाही.