कोल्हापूरच्या तन्वीच्या हाती मुंबई रेल्वेचे स्टेअरिंग

मुंबईच्या पश्चिम रेल्वेमध्ये लोको पायलट म्हणून तन्वीने स्टेअरिंग हाती घेऊन यशस्वी करिअरचा प्रेरणादायी प्रवास सुरू केला आहे.

कोल्हापूर (प्रतिनिधी):परिघाबाहेरील करिअरचे आकाश शोधणाऱ्या आणि अथक परिश्रमातून तिथंपर्यंतचे ध्येय गाठणाऱ्या मुलींच्या पंक्तीत कोल्हापूर जिल्ह्यातील वडणगे या छोट्या गावातील तन्वी तानाजी चौगुले हिचे नाव समाविष्ट झाले आहे. मुंबईच्या पश्चिम रेल्वेमध्ये लोको पायलट म्हणून तन्वीने स्टेअरिंग हाती घेऊन यशस्वी करिअरचा प्रेरणादायी प्रवास सुरू केला आहे. जिल्ह्यातील पहिली महिला लोको पायलट म्हणून तन्वीने कोल्हापूरला नव्या वर्षाची भेट दिली आहे.

वडणगे या गावात शेतकरी कुटुंबातील ही कन्या. गावातल्या शाळेत सातवीपर्यंतचे शिक्षण घेऊन कोल्हापुरातील एमएलजी शाळेतून माध्यमिक शिक्षण तन्वीने पूर्ण केले. मेकॅनिकल या विषयात
रस असल्याने या शाखेतून तिने पदवी घेतली. महाविद्यालयीन जीवनापासूनच करिअरची वेगळी वाट निवडण्याचे स्वप्न तिला खुणावत होते. त्यासाठी सतत तन्वीची शोधक नजर वर्तमानपत्रे, तज्ज्ञांची व्याख्याने यामध्ये नवं काही करण्याची ऊर्मी देणारे शब्द शोधायची. दरम्यान, रेल्वे खात्यात लोकापायलट या पदासाठीची जाहीरात तिच्या वाचनात आली. अर्ज केल्यानंतरच तन्वी या पदाच्या परीक्षेच्या तयारीसाठी लागली. लेखी परीक्षेसोबत या पदासाठी मानसिक सक्षमतेचीही चाचणी द्यावी लागते. हजारो प्रवाशांचा जीव लोको पायलटच्या हातात असल्याने तसेच इमर्जन्सीमध्ये येणाऱ्या प्रसंगात त्वरीत निर्णय घेणे, प्रसंगावधान राखणे यासाठी मानसिकदृष्ट्या सक्षम असणे आवश्यक असते. पूर्व, मुख्य आणि मानसिक चाचणी या परीक्षांमध्ये तन्वीने बाजी मारली आणि तिचा प्रशिक्षणाच्या दिशेने प्रवास सुरू झाला. वडणगेसारख्या ग्रामीण भागातून केवळ शिक्षणासाठी शहरात आलेल्या तन्वीला रेल्वे खात्याच्या परीक्षेचे मार्गदर्शन नसतानाही तिने जिद्दीने यश मिळवले.
या परीक्षेसाठी बिहार, उत्तर प्रदेशमधून अधिक अर्ज आले होते. त्यातही मुलींची संख्या खूपच कमी होती. या पदासाठी आवश्यक असलेले मनोधैर्य मला माझ्या ग्रामीण जीवनशैलीने दिले. या पदासाठी अंतिम निवड झालेल्या देशातील तीन मुलींमध्ये मला स्थान मिळाल्याचा आनंद आहे.

संबंधित पोस्ट